La güestia del XXI

El copyleft y el comunismu: La güestia del XXI ASTURNEWS 10/01/2005 Próspero Morán Diben toos cimblando de llerza, los guardias civiles de la posguerra, cuando sentíen a Antón cola metralleta o a Colás cola dinamita. Y agora resulta que les fuercies del orde (del nuevu orde de la nueva economía de la nueva europa de la nueva costitución) tán tremando mesmamente cuando sienten a los bloggers, a los escritores de bitácores, a los nuevos redentores del periodismu dixital falar de compartir idegues y la testos d'altor. ¡Quien lo diba decir! Agora resulta que los que sofiten el 'copyleft', la llibre distribución de cualaquier testu o creación (seya lliteraria, musical o informática) son comunistes nomaos (o polo menos marsistes) que tán enfotaos en pone-y la fin al mundiu capitalista de la economía de mercáu y mal nomáu bienestar. Too entama nuna entrevista que Bill Gates-y concede a news.com. Al lleela, dellos collacios del movimientu 'copyleft' entamen a interpretar que Bill Gates diz una barbaridá: "There are fewer communists in the world today than there were. There are some new modern-day sort of communists who want to get rid of the incentive for musicians and moviemakers and software makers under various guises". O lo que ye lo mesmo: "Hai munchos menos comunistes nel mundu anguañu qu'entós. Hai dalgunos que son un nuevu tipu de comunistes que-yos pruye desaniciar los incentivos pa los músicos y creaores cinematográficos y pa los programaores informáticos baxo delles fórmules". Darréu, ún nomáu blog que tien por nome Boing Boing fai un comentariu llaceriosu sobro la cuestión. Y los munchos llectores hispanos que tien esi blog entamen a esparder la noticia. Dalgunos fain alcordanza d'un comentariu satíricu sobre los hermanos Warner y los drechos de Casablanca col que Groucho Marx dexó claro en "Groucho y yo" un problema que daquella nun facía atalantar la que se nos venía enrriba. Otros cenciellamente entamaron a comentar y esparder entá más les opiniones bárbares de Gates: Marta Peirano y Antonio Córdoba en Elástico ficieron delles anotaciones(1, 2, 3). También hubo comentarios irónicos como los d'Ugarte con un títulu apropiáu Guerra eterna en Oriente Medio o los de Antonio Chinchetru el perbon blog "Mangas Verdes" o'l de Enrique Dans . Y eso ensin escaecer referencies más nidies ya iróniques como la de República Internet o esi siempre acertáu Pepe Cervera nel so Retiariu. En tou casu ye tan vieyu como manoseáu esti plantegamientu de Bill Gates que da bona imaxe de cómo fala'l capitalismu de la nueva economía nos Estaos Xuníos. Dende llueu, los direutivos de Microsoft guardense muncho de glayar barbaridaes al altu la lleva d'esta mena, pero eso ye equí, n'Europa. Na capital del mundiu democráticu, nesi país onde de sopitu voten diez veces más paisanos de los que tan censaos si fai falta (too pa que salga elexíu'l que tien de salir) los animales tamién son toos iguales, pero dalgunos (comunistes ya militantes del copyleft) son menos iguales qu'otros.