03/10/2006 La Revolución d'Ochobre de 1934 d'Albert Camus llega al teatru n'asturianu nuna representación única de Barataria Teatro

El director de la Escuela d'Arte d'Uvieu, Alfonso Granda, diseñó un cartel exclusivu pa promocionar esta representación Redaccion


El grupu Barataria Teatro y l'Asociación Cultural Cauce Nalón van llevar los próximos díes 6 y 7 d'ochobre, a les ocho la tarde, nel Teatru de L'Entregu, una pieza dramática del francés Albert Camus, col envís de remembrar la Revolución d'Ochobre. Nuna representación única n'Asturies y España y per primer vez n'asturianu, nuna cuidada versión del escritor Milio Rodríguez Cueto, Barataria Teatro xube a los escenarios la pieza 'Revuelva n'Asturies' escrita n'Arxel en 1936 pol escritor existencialista francés Albert Camus, pocos meses primero de qu'españare la guerra civil. Los ayuntamientos de Llaviana y Samartín del Rei Aurelio, asina como la Xunta Xeneral del Principáu, apoyen esti eventu nel 72º aniversariu del levantamientu obreru del 34. La llectura dramatizada de 'Revuelta n'Asturies' va contar con un total de 12 actores, dirixíos por Roberto Corte, y ayudaos por amplios efectos sonoros y de lluces, nel que too ta absolutamente midío y cuidao hasta'l puntu de que cada personaxe va tener el so acentu propiu, según la so procedencia. Hai que señalar, pa encamentar inda más la so valía, que la obra Revuleta n'Asturies de Camus nunca fuere representada tovía n'España, razón de más pa valorar esti estrenu.
Fuente AsturNews
Agencia Asturiana Informal de Noticias