La ESAD, l´ITAE y l´Arango

BONI 08/10/2004 El llunes inauguróse, na Escuela Superior d´Arte Dramáticu d´Asturies, el segundu cursu y el so tercer añu de funcionamientu. Amás, nesta ocasión estrénase un nuevu equipu directivu con Eladio de Pablo como Xefe d´Estudios y con Carmen Rodríguez de cabezalera. Los ciudadanos de Xixón conocímosla como aquella directora del Conservaroriu, a la que nun-y daba rabia ponese na primer filera de les movilizaciones de pas y alumnos de la so propia escuela, solicitándo-yos a les instituciones competentes qu´ameyoraren les instalaciones del Centru Municipal d´El Coto, onde s´ubica. Nuna curtia presentación y en nome de tol personal docente y llaboral que compón la escuela, comunicó la ilusión cola qu´entamaben esta nueva andadura, y depués de da-yos la bienvenida a los alumnos, apurrió-y la palabra al veteranu actor asturianu Carlos Alvarez Novoa. Nun coloquiu bien prestosu, baxo´l títulu de Actores, non monigotes , Carlos punxo a disposición de los alumnos tola sabencia acumulada en cuarenta y cinco años de llabor teatral, cola intelixencia, la senciellez, la dignidá y el rellumu que-y ye propiu; una llección maxistral lloñe del academicismu y averada a la vida; un brinde a amar el Teatru y a dignificar el so principal vehículu: l´actor, l´actriz. Un estupendu comienzu de cursu d´esta reclamada Escuela Superior a la que tenemos que desea-y una andadura feliz, anque pa la xente del teatru asturianu la so directora seya una desconocida, asuntu secundariu dafechu, yá que l´actividá de la escuela, lóxicamente, va ser puramente académica. Un llabor diferente que tará mui lloñe de la divulgación, coordinación, promoción, espardimientu, dinamización, documentación y contactos que´l teatru asturianu y les sos xentes necesiten y que, bien, mal, abondo o poco, venía faciendo, dende 1985, l´Institutu del Teatru y les Artes Escéniques d´Asturies. Dícenme que´l decretu de disolución del ITAE ta a la espera de firmase. Ye dicir, quieren acabar cola actividá antes mentada, pero amás ponse en claru peligru al Circuitu Asturianu de Teatru, los Premios Asturies y Casona , como tamién otres munches iniciatives propiciaes por Julia Martín, l´anterior directora del ITAE. Ella tovía pasa pel so despachu, que tamién lo ye de la nueva directora de la Escuela. Una situación que paecería grotesca, si nun fuere indignante: pol sinsentíu y la crueldá llaboral na que s´atopa, pol marafundiu de recursos humanos y el deterioru d´una funcionaria a la que-y va costar superar el despreciu a la que se ve sometida. L´ITAE nun tenía que desapaecer. Hai muncho que facer dende él y Julia Martín, que conoz como nenguna la realidá teatral asturiana, tenía que siguir dirixéndolu dende un llugar de privilexu que m´atrevo a proponer: l´entresuelu (encuriosáu) del Teatru Arango de la cai La Merced de Xixón.