La oficialidá y el país estrambóticu

24/06/2005 La oficialidá y el país estrambóticu Próspero Morán Somos munchos los que tamos fartos de dicilo, de razonalo, d’argumentalo. Siempre poles buenes… enxamás poles males. Somos falantes qu’enxamás ficiéremos una reivindicación poles males. Nin la fadremos. Somos munchos los que tamos fartos de perder perres por mor de cuestiones llingüístiques. Agora que seguimos enfotaos na negociación con Europa pa que l’efectu estadísticu nun mos dexe con dos palmos de ñaples y dengún euru nel bolsiellu, convién traer a colación les perres que perdimos y perdemos por nun tener considerada como oficial a la llingua asturiana nel Estatutu d’Autonomía. Perdimos una ayalga presupuestaria cuando ficimos les tresferencies educatives por que l’asturianu nun yera oficial. Les tresferencies negociáronse podo dempués que les de Baleares. Les isles recibieron dellos miles de millones de pesetes pa dotar el profesoráu de mallorquín nes escueles y crearon un montón d’emplegos. Nós, nun recibimos un res, y cada vegada tenemos más mayestros en paro. Hai menos d’un mes perdimos (por nun pasar tres fueyes citando casos) dellos emplegos y un cientu millones de pesetes por nun tener la oficialidá. Toles llingües españoles, menos la de nueso, van poer emplegase n’Europa y l’estáu español (que somos toos) va pagalo. Nós pagaremos los traductores de los demás, pero los demás nun van paganos un res a nós. Van crease empleos pa catalanes, valencianos, vascos y gallegos. Pero non p’Asturianos. Y eso que tenemos lo mesmo qu’ellos: una llingua propia de la que tendríemos sentinos tan orgullosos como ellos se sienten. Y vamos perder un cientu millones d’euros y un cientu de cientos d’emplegos. La fonda reforma que ta faciendo’l gobiernu col anteproyectu de llei xeneral audiovisual, recueye una demanda hestórica del sector: dictamina que los titulares de canales dixitales que emitan en abierto y cuya cobertura incluya autonomíes con llingua propia van tar obligaos pola llei a ufiertar versiones doblaes o subtitulaes notres llinguas oficiales. El 25% de los programes grabaos de ficción, animación o documentales de les teles dixitales tienen d’ofrecer dicha posibilidá. Y por nun ser oficial l’asturianu vamos perder cientos de puestos de trabayu y munches… munches perres. Ye de risa… como ye de risa que tenga que salir IX-BA a desixir que l’asturianu seya un requisitu pa trabayar na televisión asturiana.. como ye de risa qu’entá nun sepamos si va ser el 25% o’l 50% lo que va emitir n’asturianu la televisión asturiana. ¿Cómo se pue escoyer personal sin saber no que va trabayar? Pues eso ye lo que paez que va facer la Tv asturiana: meter periodistes ensin importar que sepan facer porque nun van escoyese en función de les sos habilidaes pa facer lo que se va programar. Ente otres coses porque nun sabemos qué se va programar, nin muncho menos en que llingua se va facer. Bono, sí. Sabemos que n’inglés nun va ser. Pero paez que daquién pretendía que’l conocimientu d’inglés fora más méritu que’l conocimientu l’asturianu. Somos munchos los que tamos fartos de despropósitos. Y de la ceguera de los nuesos políticos. Fartos de mediocridá. Hai entá unos meses poníase en dulda que los vuelos baratos d’Easyjet traxeren turistes a Asturies. Dicíase que lo que diben ufiertar yera la posibilidá de que toos marcharemos de vacaciones al estranxeru. Esti mes persabemos que no que va d’añu ya vinieron a Uviéu el doble de turistes estranxeros que l’añu anterior. ¿Sedrá casualidá? Somos munchos y toos bien formaos y espertos los que nun somos a entender porque Asturies ye siempre la escepción. ¿Por qué si tolos demás tienen llingua oficial, si tolos demás teníen cuantayá televisión, si tolos demás tienen un estutu en condiciones, si tolos demás puen convocar elecciones anticipaes, por qué si tolos demás ….. NOSOTROS NON? ¿Qué ye... qué vamos ser nós los únicos espabilaos d’esti Estáu? ¿Nun sedrá que los desacertaos, los despistaos, los tontos… somo nós? ¿Nun seremos nosotros los que nun tamos faciendo bien los deberes? ¿o ye qué vamos dir tola vida de víctimes, de cha-y la culpa de los suspensos al profesor que nos tien tirria? L’últimu en recordanos que los enquivocaos debemos ser nós ye un espertu de gran nivel, un economista como Juan Velarde. Esti domingu 19 de Xunu facía alcordanza en La Nueva España (¡qué nome verdá! Es Nueva España de la democracia y les autonomíes a la que paez que nós nun pertenecemos) d’esto mesmo. Dicía Velarde, nun artículu de titulu esclariador “La región estrambótica” que nun yera a entender qué pasaba con Asturies que ye la única rexón d’España que nun siguen una cenciella llei de converxencia: les comunidaes autónomes que tienen mayor PIB (productu interior brutu) por habitante xorrecen más seliquino y les que lu tienen menos xorrecen más aprisa, falando de los 9 años que van ente1995 y 2004. Toes cumplen esta lóxica menos nós. Y Velarde entrúgase si..”¿No es todo esto un motivo muy serio para que cunda la preocupación de políticos, de figuras significativas en todos los órdenes, de Asturias?”. Somos munchos (mayormente asturianistes, nacionalistes, socialistes –pocos con poder executivu pero dellos hai-, comunistes ya inclusu del PP, xente con xacíu, con sentíu común en xeneral) los qu’hai tiempu que nos facemos la mesma entruga retórica que se fai Velarde. Pero paez que nun somos bultables o consideraos o espertos o… asturianos. Ün ya nun sabe nin lo que ye. Ya nun sabe nin siquier si ye (o si paga la pena ser) asturianu. Lo que si sabe ye que son munchos como elli. Y casi toos xente moza. Esa mesma qu’emigra porque nun atopa trabayu pala so bona preparación. Esa mesma que nun entiende un res de la política del Principáu. Esa que nun entiende porque-y llamen Principáu a una tierra de republicanos. Qué tien que ver el nome’l territoriu col nome de la institución que lu gobierna. El nome (y la institución mesma) d’esi muérganu de gobiernu pue camudar cualquier día, pero’l nome’l territoriu nun camuda (nin camudó en munchos sieglos d’hestoria). Somos munchos los que nun entendemos un res. Nin entedemos por qué hai que mecer el tocín cola velocidá. Nin por qué paecemos los más fatos d’España. Somos munchos los que tamos fartos d’esto. Y hasta agora (con subvenciones a millones) tabemos tamién fartucos. El problema ye que cuando aporten les vaques flaques echaremos de menos (y muncho) les perres que nos cuesta que l’asturianu nun seya oficial. Pero claro… ¡Será por perres!